ໃນວັນທີ 18 ຕຸລາ 2024 ທີ່ ລັດວິສາຫະກິດໄຟຟ້າກໍາປູເຈຍ (EDC), ນະຄອນ ພະນົມເປນ, ລາຊະອານາຈັກ ກໍາປູເຈຍ, ໄດ້ຈັດພິທີເຊັນສັນຍາຊື້-ຂາຍໄຟຟ້າ (PPA) ຂອງໂຄງການເຂື່ອນໄຟຟ້ານໍ້າພາກ ລະຫວ່າງ ບໍລິສັດ ຈະເລີນເຊກອງ ພະລັງງານ ຈໍາກັດ (CSE) ຕາງໜ້າລົງນາມໂດຍ ທ່ານ ຈັນທະໜອມ ພົມມະນີ ປະທານຄະນະຜູ້ບໍລິຫານງານ CSE ພ້ອມຄະນະ ແລະ ລັດວິສາຫະກິດໄຟຟ້າ ກຳປູເຈຍ (EDC) ຕາງໜ້າລົງນາມໂດຍ H.E. Dr. Praing Chulasa, RGC Delegate in charge as Managing Director of EDC ພ້ອມຄະນະ ໂດຍການໃຫ້ກຽດຢ່າງສູງເປັນສັກຂີພະຍານ ຂອງທ່ານ ແກ້ວ ລົດຕະນາກ, ລັດຖະມົນຕີ ກະຊວງ ພະລັງງານ ແລະ ບໍ່ແຮ່ ແຫ່ງລາຊະອານາຈັກ ກໍາປູເຈຍ. ຜົນສໍາເລັດໃນຄັ້ງນີ້ ຖືເປັນຂີດໝາຍອັນສໍາຄັນ ທີ່ສະແດງໃຫ້ເຫັນເຖິງຄວາມຕັ້ງໃຈ ແລະ ຄວາມມຸ່ງໝັ້ນຂອງທັງສອງຝ່າຍ ໃນການຮ່ວມເຮັດວຽກ, ແລກປ່ຽນ ແລະ ເຈລະຈາຮ່ວມກັນໃນຊ່ວງໄລຍະເວລາຫຼາຍເດືອນທີ່ຜ່ານມາ ໂດຍໄດ້ຮັບການສະໜັບສະໜູນ ຈາກ ລັດຖະບານ ສປປ ລາວ ແລະ ລາຊະອານາຈັກກຳປູເຈຍ ຈົນສາມາດບັນລຸຂໍ້ຕົກລົງເປັນເອກະພາບຮ່ວມກັນ.
ໂຄງການເຂື່ອນໄຟຟ້ານໍ້າພາກ ຕັ້ງຢູ່ ບ້ານໜອງຫຼວງ, ເມືອງປາກຊ່ອງ, ແຂວງຈໍາປາສັກ, ສປປ ລາວ ເຊິ່ງມີກຳລັງການຕິດຕັ້ງ 168MW, ໄດ້ເລີ່ມລົງມືກໍ່ສ້າງນັບແຕ່ປີ 2022 ເປັນຕົ້ນມາ, ໂດຍໄດ້ວ່າຈ້າງ ບໍລິສັດ Tractebel ທີ່ມີຊື່ສຽງລະດັບສາກົນ ຈາກປະເທດ ເບລຢຽມ ເປັນບໍລິສັດທີ່ປຶກສາ, ບໍລິສັດ Song Da-5 ຈາກ ສສ ຫວຽດນາມ ເປັນຜູ້ຮັບເໝົາກໍ່ສ້າງພາກໂຍທາ ແລະ ບໍລິສັດ Voith ຈາກປະເທດ ອິນເດຍ ເປັນຜູ້ສະໜອງດ້ານກົນຈັກ-ໄຟຟ້າ. ມາຮອດປັດຈຸບັນ ມີຄວາມຄືບໜ້າໃນການກໍ່ສ້າງໂຄງການດັ່ງກ່າວຢູ່ທີ່ 50% ໂດຍສະເລ່ຍ ແລະ ຄາດວ່າຈະກໍ່ສ້າງສຳເລັດພາຍໃນເດືອນ ມີນາ ປີ 2026 ເພື່ອສົ່ງຂາຍໄຟຟ້າໃຫ້ ລັດວິສາຫະກິດໄຟຟ້າ ກຳປູເຈຍ (EDC) ຕາມກອບເວລາທີ່ໄດ້ລົງນາມຮ່ວມກັນ.
ການຮ່ວມມືກັນໃນຄັ້ງນີ້ ບໍ່ພຽງແຕ່ຊ່ວຍເພີ່ມທະວີ ສາຍພົວພັນອັນດີງາມ ລະຫວ່າງສອງປະເທດ ລາວ ແລະ ກໍາປູເຈຍ ເທົ່ານັ້ນ, ແຕ່ຍັງເປັນການ ປະກອບສ່ວນເຂົ້າໃນການພັດທະນາແບບຍືນຍົງ ແລະ ຕ່າງຝ່າຍຕ່າງມີຜົນປະໂຫຍດຮ່ວມກັນ. ໂຄງການດັ່ງກ່າວ ຈະສາມາດປະກອບສ່ວນເຂົ້າໃນການພັດທະນາເສດຖະກິດຂອງທັງສອງປະເທດ ເຮັດໃຫ້ມີບັນຍາກາດຂອງການຮ່ວມມື ລາວ-ກຳປູເຈຍ, ກຳປູເຈຍ-ລາວ ໂດຍສະເພາະເປັນການສົ່ງເສີມການນຳໃຊ້ພະລັງງານສະອາດ ຕາມນະໂຍບາຍການຮ່ວມມືທາງດ້ານການຄ້າຂອງສອງປະເທດ ໃຫ້ປາກົດຜົນເປັນຈິງ ແລະ ຈະເປັນໂຄງການ ຕົວແບບທີ່ດີ ສໍາລັບໂຄງການອື່ນໆໃນ ສປປ ລາວ ທີ່ຕ້ອງການຮ່ວມມືກັບ EDC ໃນອະນາຄົດອີກດ້ວຍ.
