ໃນວັນທີ 16 ທັນວາ 2024 ທີ່ ທະນາຄານພັດທະນາລາວ (LDB), ສໍານັກງານໃຫຍ່ ນະຄອນຫຼວງວຽງຈັນ, ໄດ້ຈັດພິທີເຊັນສັນຍາຮ່ວມລົງທຶນ ໂຄງການເຂື່ອນໄຟຟ້າຫ້ວຍເຫາະ ແລະ ເຊັນສັນຍາຮ່ວມພັດທະນາໂຄງການພະລັງງານນໍ້າ ໃນ ສປປ ລາວ ລະຫວ່າງ ບໍລິສັດ ຈະເລີນເຊກອງ ພະລັງງານ ຈໍາກັດ (CSE) ຕາງໜ້າລົງນາມໂດຍ ທ່ານ ລິດສະໝີ ລາດຊະວົງ ຮອງປະທານຄະນະຜູ້ບໍລິຫານງານ CSE ແລະ ບໍລິສັດ ໂກຣໂບລ ພາວເວີ ຊິນເນີຈີ້ ຈໍາກັດ ມະຫາຊົນ (GPSC) ຕາງໜ້າລົງນາມໂດຍ ທ່ານ ສິລິເມດ ລິພາກອນ ຜູ້ອໍານວຍການຝ່າຍ ປະຕິບັດງານ GPSC ແລະ ປະທານບໍລິສັດ ໄຟຟ້າຫ້ວຍເຫາະ ເເລະ ທ່ານ ມະນະໄຊ ຄົງຣັກກະວິນ ຮອງປະທານ GPSC ແລະ ຫົວໜ້າຝ່າຍ ພັດທະນາທຸລະກິດ ພ້ອມຄະນະ; ໂດຍການໃຫ້ກຽດເຂົ້າຮ່ວມເປັນສັກຂີພະຍານ ຂອງທ່ານ ຈັນທະໜອມ ພົມມະນີ, ປະທານຄະນະຜູ້ບໍລິຫານງານ ບໍລິສັດ ຈະເລີນເຊກອງ ພະລັງງານ ຈໍາກັດ ເເລະ ທ່ານ ປຣີຊາ ກັນທະມູນ ຜູ້ອໍານວຍການຝ່າຍ ກໍ່ສ້າງ ແລະ ພັດທະນາໂຄງການ ບໍລິສັດ CSE ພ້ອມດ້ວຍ ຄະນະບໍລິຫານ ຂອງບໍລິສັດ CSE ແລະ GPSC.
ໂຄງການເຂື່ອນໄຟຟ້າຫ້ວຍເຫາະ ຕັ້ງຢູ່ ບ້ານຫ້ວຍເຫາະ, ເມືອງສາມັກຄີໄຊ, ແຂວງອັດຕະປື, ສປປ ລາວ ກຳລັງການຕິດຕັ້ງ 152MW, ເລີ່ມລົງມືກໍ່ສ້າງຢ່າງເປັນທາງການໃນປີ 1994 ໄດ້ເປີດຂາຍໄຟຟ້າເປັນທາງການໃນວັນທີ 3 ກັນຍາ ປີ 1999 ແລະ ສາມາດຜະລິດພະລັງງານໄຟຟ້າໄດ້ສະເລ່ຍ 433 ລ້ານ KWh ຕໍ່ປີ, ບໍລິສັດໄຟຟ້າຫ້ວຍເຫາະ (HHPC) ແມ່ນບໍລິສັດຮ່ວມທຶນ ລະຫວ່າງ ບໍລິສັດ ໂກລກຣຸບ (Glow Group), ລັດວິສາຫະກິດໄຟຟ້າລາວ (EDL), ການໄຟຟ້າເເຫ່ງປະເທດໄທ (ກຟຜ) ແລະ ບໍລິສັດ WHA Energy. ເຂື່ອນດັ່ງກ່າວ ເປັນເຂື່ອນຜະລິດໄຟຟ້າເອກະຊົນຂະໜາດໃຫຍ່ (IPP) ທຳອິດຢູ່ໃນ ສປປ ລາວ ສົ່ງຂາຍໄຟຟ້າໃຫ້ ກຟຜ ພາຍໃຕ້ສັນຍາຊື້-ຂາຍໄຟຟ້າໄລຍະຍາວ (PPAs) ແລະ ອີກຈຳນວນໜຶ່ງແມ່ນຂາຍໃຫ້ ຟຟລ ເພື່ອສະໜອງໃຫ້ແກ່ການຊົມໃຊ້ຂອງຊຸມຊົນໃນເຂດໃກ້ຄຽງ.
ການຮ່ວມມືກັນໃນຄັ້ງນີ້ ເປັນບາດກ້າວສໍາຄັນ ຂອງທັງສອງບໍລິສັດ ໂດຍມີເປົ້າໝາຍຈະສະໜອງພະລັງງານໄຟຟ້າໃຫ້ກັບ ລາດຊະອານາຈັກໄທ ເເລະ ບັນດາປະເທດໃກ້ຄຽງ ເພື່ອປະກອບສ່ວນເຂົ້າໃນການພັດທະນາເເບບຍືນຍົງ ຕ່າງຝ່າຍຕ່າງມີຜົນປະໂຫຍດຮ່ວມກັນ ທັງເປັນການສົ່ງເສີມການນຳໃຊ້ພະລັງງານສະອາດ ຕາມນະໂຍບາຍການຮ່ວມມືທາງດ້ານພະລັງງານຂອງສອງປະເທດ ໄທ-ລາວ, ລາວ-ໄທ ໃຫ້ປາກົດຜົນເປັນຈິງ.
