ໃນວາລະພິທີດັ່ງກ່າວ ປະກອບມີ 1) ການເຊັນສັນຍາຮ່ວມມືພັດທະນາ (MOA) ໂຄງການຫຼຸດຜ່ອນການປ່ອຍທາດອາຍເຮືອນແກ້ວ ຈາກການທໍາລາຍປ່າໄມ້ ແລະ ເຮັດໃຫ້ປ່າໄມ້ຊຸດໂຊມ ລະຫວ່າງ ລັດຖະບານແຫ່ງ ສປປ ລາວ ຕາງໜ້າໂດຍ ກະຊວງ ກະສິກໍາ ແລະ ປ່າໄມ້ ຮ່ວມກັບ ບໍລິສັດ ຈະເລີນເຊກອງ ຄາບອນ ຈໍາກັດ (ໄລຍະ 2); 2) ການເຊັນບົດບັນທຶກຄວາມເຂົ້າໃຈ (MOU) ເພື່ອສຶກສາຄວາມເປັນໄປໄດ້ ໃນການພັດທະນາໂຄງການຫຼຸດຜ່ອນທາດອາຍເຮືອນແກ້ວ ຈາກການທຳລາຍປ່າໄມ້ ແລະ ເຮັດໃຫ້ປ່າໄມ້ຊຸດໂຊມ (REED+) (ໄລຍະ 3) ລະຫວ່າງ ກະຊວງກະສິກໍາ ແລະ ປ່າໄມ້ ຕາງໜ້າໂດຍ ກົມປ່າໄມ້ ແລະ ກົມແຜນການ ແລະ ການຮ່ວມມື ຮ່ວມກັບ ບໍລິສັດ ຈະເລີນເຊກອງ ຄາບອນ ຈຳກັດ; ແລະ 3) ການເຊັນບົດບັນທຶກຄວາມເຂົ້າໃຈ (MOU) ເພື່ອປຶກສາຫາລື ແລະ ຄົ້ນຄວ້າ ໃນການສ້າງຕັ້ງບໍລິສັດ ຮ່ວມມື ໃນການຄຸ້ມຄອງ ການຊື້-ຂາຍ ສິນເຊື່ອກາກບອນ ລະຫວ່າງ ກະຊວງກະສິກໍາ ແລະ ປ່າໄມ້ ຕາງໜ້າໂດຍ ກົມແຜນການ ແລະ ການຮ່ວມມື, ກົມປ່າໄມ້ ຮ່ວມກັບ ບໍລິສັດ ຈະເລີນເຊກອງ ຄາບອນ ຈໍາກັດ ເພື່ອສືບຕໍ່ສະໜັບສະໜູນການກໍານົດເງື່ອນໄຂ ແລະ ສ້າງນິຕິກໍາໃຕ້ກົດໝາຍທີ່ຈໍາເປັນ ສໍາລັບການພັດທະນາໂຄງການສິນເຊື່ອກາກບອນປ່າໄມ້ ໃນການຫຼຸດຜ່ອນການປ່ອຍທາດອາຍເຮືອນແກ້ວ ຈາກການທໍາລາຍປ່າໄມ້ ແລະ ການເຮັດໃຫ້ປ່າໄມ້ຊຸດໂຊມ (REDD+) ໄປຄຽງຄູ່ກັບການຟື້ນຟູ, ປູກຕົ້ນໄມ້ ແລະ ບູລະນະປ່າໄມ້ (APP) ໃນພື້ນທີ່ເປົ້າໝາຍຂອງໂຄງການ ໃຫ້ມີຄວາມອຸດົມສົມບູນ ແລະ ຍືນຍົງໃນເຂດປ່າປ້ອງກັນແຫ່ງຊາດ 3 ແຫ່ງຄື: ປ່າປ້ອງກັນແຫ່ງຊາດຍອດນໍ້າພູພຽງບໍລິເວນ (ກວມເອົາແຂວງຈໍາປາສັກ, ແຂວງສາລະວັນ, ແຂວງອັດຕະປື); ປ່າປ້ອງກັນແຫ່ງຊາດ ແຫຼ່ງນໍ້າກົງ-ເຊຊຸ (ແຂວງ ອັດຕະປື) ແລະ ປ່າປ້ອງກັນແຫ່ງຊາດ ນໍ້າເຊກອງ-ເຊຂະໝານ (ແຂວງເຊກອງ).
ການເຊັນສັນຍາຮ່ວມມືໃນຄັ້ງນີ້ ແມ່ນເປັນບາດກ້າວສຳຄັນ ຂອງໂຄງການ ທີ່ຈະຊ່ວຍປົກປັກຮັກສາ ແລະ ຟື້ນຟູປ່າໄມ້ ໂດຍສະເພາະ ໃນເຂດທີ່ໄດ້ຮັບອະນຸຍາດ ໃຫ້ປະສົບຜົນສຳເລັດ ແລະ ມີຄວາມຍືນຍົງ ຊ່ວຍເພີ່ມພື້ນທີ່ການປົກຫຸ້ມຂອງປ່າໄມ້ ໃນຂອບເຂດທົ່ວປະເທດ, ສ້າງຄຸນຄ່າທາງດ້ານເສດຖະກິດ, ສ້າງອາຊີບໃຫ້ແກ່ປະຊາຊົນບັນດາເຜົ່າ ຢູ່ທ້ອງຖິ່ນ ໃຫ້ມີລາຍຮັບທີ່ໝັ້ນຄົງ ເພື່ອປະກອບສ່ວນເຂົ້າໃນການພັດທະນາເສດຖະກິດ-ສັງຄົມ ຂອງຊາດ. ພ້ອມດຽວກັນ, ກໍຈະເປັນອີກທ່າແຮງໜຶ່ງ ທີ່ເຮັດໃຫ້ ສປປ ລາວ ມີບົດບາດສຳຄັນໃນການປະກອບສ່ວນຈັດຕັ້ງປະຕິບັດພັນທະຂອງຕົນ ໃນເວທີພາຄີສາກົນ ເປັນຕົ້ນແມ່ນ ການປະຕິບັດພັນທະປະເທດພາຄີ ຂອງສົນທິສັນຍາສາກົນ ວ່າດ້ວຍການປ່ຽນແປງດິນຟ້າອາກາດ ຂອງອົງການສະຫະປະຊາຊາດ ຫຼື UNFCCC ແລະ ຂໍ້ຕົກລົງປາຣີສ (Paris Agreement) ທີ່ຈະຊ່ວຍຮັກສາອຸນຫະພູມສະເລ່ຍຂອງໂລກບໍ່ໃຫ້ເພີ່ມຂຶ້ນເກີນລະດັບ 2 ອົງສາ ອີກດ້ວຍ.
![](https://csenergy.la/wp-content/uploads/2024/07/40-300x200.jpg)
![](https://csenergy.la/wp-content/uploads/2024/07/41-300x200.jpg)
![](https://csenergy.la/wp-content/uploads/2024/07/43-300x200.jpg)
![](https://csenergy.la/wp-content/uploads/2024/07/39-300x200.jpg)
![](https://csenergy.la/wp-content/uploads/2024/07/38-300x200.jpg)
![](https://csenergy.la/wp-content/uploads/2024/07/37-300x200.jpg)
![](https://csenergy.la/wp-content/uploads/2024/07/36-300x200.jpg)
![](https://csenergy.la/wp-content/uploads/2024/07/35-300x200.jpg)
![](https://csenergy.la/wp-content/uploads/2024/07/34_1-300x200.jpg)
![](https://csenergy.la/wp-content/uploads/2024/07/34-300x200.jpg)
![](https://csenergy.la/wp-content/uploads/2024/07/33_1-300x200.jpg)
![](https://csenergy.la/wp-content/uploads/2024/07/33-300x200.jpg)
![](https://csenergy.la/wp-content/uploads/2024/07/31-300x200.jpg)
![](https://csenergy.la/wp-content/uploads/2024/07/29-300x200.jpg)
![](https://csenergy.la/wp-content/uploads/2024/07/30-300x200.jpg)
![](https://csenergy.la/wp-content/uploads/2024/07/28_1-300x200.jpg)