ບໍລິສັດ ຈະເລີນເຊກອງ ພະລັງງານ ຈຳກັດ ຍາມໃດກໍໄດ້ເອົາໃຈໃສ່ຕໍ່ບັນຫາສິ່ງແວດລ້ອມດ້ວຍຄວາມຮັບຜິດຊອບສູງ ແລະ ເປັນປົກກະຕິຕໍ່ເນື່ອງ. ທຸກໆໂຄງການຂອງບໍລິສັດພວກເຮົາ ມີເປົ້າໝາຍທີ່ລະອຽດ ແລະ ຊັດເຈນ ຄື : ຕ້ອງເປັນໂຄງການທີ່ມີການພັດທະນາແບບຍືນຍົງ, ພວກເຮົາມີແຜນຄຸ້ມຄອງ ແລະ ຕິດຕາມກວດກາສິ່ງແວດລ້ອມ, ສັງຄົມ ແລະ ທຳມະຊາດ ເພື່ອຊ່ວຍໃນການປະຕິບັດພາລະບົດບາດ ແລະ ພັນທະຂອງຕົນ ກໍ່ໃຫ້ເກີດຜົນປະໂຫຍດທີ່ດີທີ່ສຸດຕໍ່ສິ່ງແວດລ້ອມ.

ພວກເຮົາໄດ້ເຊື່ອມໂຍງຄວາມຮັບຜິດຊອບດ້ານສິ່ງແວດລ້ອມເຂົ້າໃນທຸກກິດຈະກຳປະຈຳວັນ ໃຫ້ເປັນໄປຕາມຂໍ້ກຳນົດ ແລະ ຂໍ້ຜູກມັດຂອງກົດໝາຍ, ມີການຕິດຕາມກວດກາຄຸນນະພາບນໍ້າ, ການຈັດການຊັບພະຍາກອນທຳມະຊາດແບບຍືນຍົງ ແລະ ແບບແຜນການເຮັດວຽກພາຍໃນຢ່າງເປັນລະບົບ.

ອີກບັນຫາໜຶ່ງທີ່ສຳຄັນ ແມ່ນພວກເຮົາ ກໍ່ໄດ້ມີການຄົ້ນຄວ້າຊອກຫາວິທີການໃໝ່ໆ ທີ່ດີກວ່າສະເໜີເຂົ້າໃນການຫຼຸດຜ່ອນຜົນກະທົບດ້ານສິ່ງແວດລ້ອມ.

ແຜນຄຸ້ມຄອງ ແລະ ຕິດຕາມກວດກາສິ່ງແວດລ້ອມ ໃນເຂດອ່າງໂຕ່ງ, ເຂດອ່າງເກັບນໍ້າ ແລະ ເຂດກໍ່ສ້າງ ໄດ້ກຳນົດຂື້ນ ແລະ ຮັບຮອງເອົາໂດຍ ກະຊວງຊັບພະຍາກອນທຳມະຊາດ ແລະ ສິ່ງແວດລ້ອມ. ການຈັດຕັ້ງປະຕິບັດແມ່ນ ຮັບປະກັນຕາມແຜນການຕ່າງໆທີ່ກຳນົດໄວ້ ໂດຍສອດຄ່ອງກັບນະໂຍບາຍ ແລະ ລະບຽບຫຼັກການທີ່ກ່ຽວຂ້ອງຂອງ ສປປ ລາວ. ເຊີ່ງຈຸດປະສົງຕົ້ນຕໍ ແມ່ນ ເພື່ອປົກປັກຮັກສາສິ່ງແວດລ້ອມ ໃຫ້ມີຄວາມອຸດົມສົມບູນ ແລະ ໄດ້ຮັບການພັດທະນາ ແບບຍືນຍົງ.

ການຕິດຕາມກວດກາຄຸນນະພາບນໍ້າ ແມ່ນພວກເຮົາ ໄດ້ສ້າງຄູ່ມືວິທີການໃນການຕິດຕາມຄຸນນະພາບນໍ້າ ໂດຍມີຄວາມສອດຄ່ອງ ກັບມາດຕະຖານສິ່ງແວດລ້ອມແຫ່ງຊາດ ແລະ ສອດຄ່ອງກັບວິທີການຂອງສາກົນ. ໄດ້ກຳນົດຈຸດເກັບຕົວຢ່າງເປັນປະຈຳທຸກອາທິດ ແລະ ໄຕມາດ ໂດຍໃຊ້ຕົວແປທາງເຄມີ ແລະ ທາງຊີວະພາບ. ນອກຈາກນັ້ນ, ການເກັບຕົວຢ່າງໃນແຕ່ລະຈຸດ ແມ່ນໄດ້ສົ່ງຕົວຢ່າງໃຫ້ຫ້ອງທົດລອງ ແລ້ວນຳຜົນວິເຄາະທັງໝົດຈາກພາກສະໜາມ ແລະ ຫ້ອງທົດລອງມາເປັນ ຂໍ້ມູນຕົວຈິງຂອງແມ່ນໍ້າສາຍນັັ້ນໆ.