ໃນຕອນເຊົ້າຂອງວັນທີ 03 ຕຸລາ 2022 ທີ່ສະພາແຫ່ງຊາດ (ຕຶກໃໝ່), ບໍລິສັດ ຈະເລີນເຊກອງ ພະລັງງານ ຈຳກັດ (CSE) ຕ່າງໜ້າໂດຍທ່ານ ສິຫຸນ ສິດທິລືໄຊ ຮອງປະທານອາວຸໂສ ຊີ້ນໍາວຽກງານຫ້ອງການ-ບໍລິຫານຂອງ ບໍລິສັດ CSE ໄດ້ມອບເຄື່ອງອຸປະກອນຮັບໃຊ້ພາຍໃນຫ້ອງປະຊຸມໃຫ້ແກ່ສະພາແຫ່ງຊາດ ຕາງໜ້າຮັບໂດຍທ່ານ ນາງ ທັດສະດາພອນ ຈັນທະມາດ ຮອງປະທານກຳມາທິການບັນດາເຜົ່າ ສະພາແຫ່ງຊາດ ທັງເປັນສະມາຊິກສະພາແຫ່ງຊາດ ປະຈໍາເຂດເລືອກຕັ້ງທີ 16 ແຂວງເຊກອງ ເພື່ອນຳໄປມອບຕໍ່ໃຫ້ສະພາປະຊາຊົນແຂວງເຊກອງ ແລະ ສະພາປະຊາຊົນ ແຂວງອັດຕະປື ເຂົ້າຮ່ວມເປັນສັກຂີພິຍານມີພາກສ່ວນກ່ຽວຂ້ອງຂອງສອງຝ່າຍ.
ໂອກາດດຽວກັນນີ້, ທ່ານ ນາງ ທັດສະດາພອນ ຈັນທະມາດ ຮອງປະທານ ກຳມາທິການບັນດາເຜົ່າ ໄດ້ສະແດງຄວາມຂອບໃຈເປັນຢ່າງສູງ ທີ່ບໍລິສັດ CSE ໄດ້ໃຫ້ການຊ່ວຍເຫລືອຕໍ່ສະພາແຫ່ງຊາດ ເວົ້າລວມ ເວົ້າສະເພາະແມ່ນ ການຊ່ວຍເຫຼືອສະພາປະຊາຊົນ ແຂວງເຊກອງ ແລະ ແຂວງອັດຕະປຶ ທັງໄດ້ແຈ້ງໃຫ້ຊາບກ່ຽວກັບສະພາບຄວາມຫຍຸ້ງຍາກ ແລະ ຈໍາເປັນຂອງ 2 ສະພາປະຊາຊົນ 2 ແຂວງດັ່ງກ່າວ ທີ່ຍັງຂາດເຂີນອຸປະກອນຮັບໃຊ້ໃນຫ້ອງປະຊຸມຫລາຍຢ່າງ; ໂອກາດດັ່ງກ່າວ, ທ່ານ ນາງ ທັດສະດາພອນ ຈັນທະມາດ ຍັງໄດ້ຕາງໜ້າໃຫ້ຄະນະປະຈຳສະພາແຫ່ງຊາດ ມອບໃບຍ້ອງຍໍໃຫ້ແກ່ບໍລິສັດ ຈະເລີນເຊກອງ ພະລັງງານ ຈຳກັດ ໂດຍແມ່ນທ່ານ ສິຫຸນ ສິດທິລືໄຊ ເປັນຜູ້ຮັບ ເນື່ອງຈາກມີຜົນງານດີເດັ່ນໃນການປະກອບສ່ວນຊ່ວຍເຫລືອອຸປະກອນຮັບໃຊ້ພາຍໃນຫ້ອງປະຊຸມໃຫ້ສະພາແຫ່ງຊາດໃນຄັ້ງນີ້. ພ້ອມດຽວກັນນີ້, ທ່ານ ສິຫຸນ ສິດທິລືໄຊ ຕາງໜ້າ ບໍລິສັດ ຈະເລີນເຊກອງ ພະລັງງານ ຈໍາກັດ ກໍໄດ້ສະແດງຄວາມດີໃຈທີ່ໄດ້ປະກອບສ່ວນເຂົ້າໃນວຽກງານລວມຂອງ ສະພາແຫ່ງຊາດ ກໍຄືສະພາປະຊາຊົນທັງສອງແຂວງ ແລະ ສະແດງຄວາມຮູ້ບຸນຄຸນຢ່າງລົ້ນເຫຼືອ ຕໍ່ການຊີ້ນໍາຂອງທັງສອງແຂວງ ທີ່ໄດ້ສ້າງເງື່ອນໄຂອຳນວຍຄວາມສະດວກດ້ານຕ່າງໆ ໃຫ້ແກ່ການຈັດຕັ້ງປະຕິບັດ ໂຄງການ ພະລັງງານໄຟຟ້າຂອງ ບໍລິສັດ ຈະເລີນເຊກອງ ພະລັງງານ ຈຳກັດ.
